ஜனவரி முதல் வாரத்தில் குரூப் 1 தேர்வுக்கான அறிவிக்கை வெளியிடப்படும்: டி.என்.பி.எஸ்.சி அறிவிப்பு

0
343

ஜனவரி மாதம் முதல் வாரத்தில் குரூப் 1 தேர்வுக்கான அறிவிக்கை வெளியிடப்படும் என்று தமிழ்நாடு அரசுப் பணியாளர் தேர்வாணையம் தெரிவித்துள்ளது.

இனி வரும் காலங்களில் டி.என்.பி.எஸ்.சி குரூப் 1 தேர்வு அறிவிக்கை வெளிவந்த நாளிலிருந்து, சரியாக ஒரு வருடத்துக்குள்ளாக தேர்வு முடிவுகள் அறிவிக்கப்படும் என்று டி.என்.பி.எஸ்.சி உறுதியளித்துள்ளது. இது தொடர்பாக நேற்று (டிச.9) தமிழ்நாடு அரசுப் பணியாளர் தேர்வாணையம் வெளியிட்டுள்ள அறிவிப்பில் கூறியிருப்பதாவது:

ஒவ்வொரு வருடமும் சுமார் நாற்பதுக்கும் மேற்பட்ட டி.என்.பி.எஸ்.சி தேர்வுகள் நடத்தப்பட்டு வருகிறது. இதற்காக 30 லட்சத்துக்கும் மேற்பட்டோர் விண்ணப்பிக்கின்றனர். கடந்த 2 ஆண்டுகளாக டி.என்.பி.எஸ்.சி தேர்வு முடிவுகள் வெளிவரக்கூடிய உத்தேச கால அட்டவணை வெளியிடப்பட்டு, அதன்படி முடிவுகள் அறிவிக்கப்பட்டு வருகிறது. அதில் 6 தேர்வுகளை தவிர, மற்ற அனைத்திற்கும் அட்டவணையில் குறிப்பிட்டபடி, தேர்வு முடிவுகள் குறித்த காலத்தில் வெளியிடப்பட்டுள்ளது. அதே போல், இனி குரூப் 1 தேர்வுக்கும், அறிவிக்கை வெளியான நாளிலிருந்து ஓராண்டுக்குள்ளாக தேர்வு முடிவுகளும் வெளியிடப்படும்.

வரும் ஜனவரி மாதம் முதல் வாரத்தில் குரூப் 1 தேர்வுக்கான அறிவிக்கை வெளியிடப்படும். முதனிலைத் தேர்வு ஏப்ரல் மாதத்தில் நடத்தப்பட்டு, அதன் முடிவுகள் மே மாதம் வெளியிடப்படும். இதனைத் தொடர்ந்து, முதன்மைத் தேர்வு(Group 1 Main Exam) ஜூலை மாதம் நடத்தப்பட்டு, அதன் முடிவுகள் நவம்பரில் வெளியிடப்படும். கடைசியாக குரூப் 1 நேர்காணல் அடுத்த ஆண்டு டிசம்பர் தொடக்கத்தில் நடத்தப்பட்டு, அதன் முடிவுகள் டிசம்பர் இறுதியில் வெளியிடப்படும். இதே போல், குரூப் 2 மற்றும் குரூப் 4 பணிக்கான தேர்வுகளுக்கும் நிலையான கால அட்டவணை தயாரிக்கப்பட்டு, வெளியிடப்படும். இவ்வாறு டி.என்.பி.எஸ்.சி தெரிவித்துள்ளது.

எனவே, அரசு வேலைக்கு தயாராவோர், டி.என்.பி.எஸ்.சி தேர்வு கால அட்டவணையைப் பின்பற்றி அதற்கு ஏற்றாற் போல் திட்டமிட்டு தயாராகும்படி அறிவுறுத்தப்படுகிறார்கள். தமிழ்நாடு அரசுப் பணியாளர் தேர்வாணையத்தின் அதிகாரப்பூர்வ இணையதளம் www.tnpsc.gov.in ஆகும். விண்ணப்பதாரர்கள் அவ்வபோது டி.என்.பி.எஸ்.சி.,யின் இணையதளத்தை பார்வையிட்டு, புதிய தேர்வு கால அட்டவணை வெளிவந்துள்ளதா என்பதை பார்த்துக் கொள்ளவும்

LEAVE A REPLY

Please enter your comment!
Please enter your name here