கோவை: 76 ஆண்டு கால பள்ளி.. ஒரே ஒரு மாணவருக்காக மீண்டும் திறப்பு!

0
94

தேயிலை தோட்ட தொழிலாளர்களின் குழந்தைகளுக்காக தொடங்கப்பட்ட பள்ளி, ஒரு மாணவர் கூட சேராததால், தற்காலிகமாக மூடப்பட்டது. தற்போது மீண்டும் திறக்கப்பட்டுள்ளது.

கோவை: 76 ஆண்டு கால பள்ளி.. ஒரே ஒரு மாணவருக்காக மீண்டும் திறப்பு!
ஹைலைட்ஸ்’தன்னுடைய ஆறு வயது மகனை பள்ளியில் சேர்க்க துடிக்கும் ராஜேஸ்வரியின் ஆர்வத்தை நாங்கள் புரிந்து கொண்டோம்…’ – கல்வித்துறை அதிகாரிகள்
கோவையில் 76 ஆண்டுகளாக செயல்பட்ட தொண்மை வாய்ந்த பள்ளி, கடந்தாண்டு மூடப்பட்ட நிலையில், தற்போது ஒரே ஒரு மாணவருக்காக மீண்டும் திறக்கப்பட்டுள்ளது.

கோயமுத்தூர் மாவட்டம் வால்பாறை அருகிலுள்ள சின்னகல்லார் பகுதியில் 76 ஆண்டுகளாக அரசு தொடக்கப்பள்ளி செயல்பட்டு வந்தது. இதில் அங்குள்ள தேயிலை தோட்டத்தில் பணியாற்றும் கூலித்தொழிலாளர்களின் குழந்தைகள் படித்து வந்தனர். காலம் செல்ல செல்ல தேயிலை தோட்ட தொழிலாளர்கள் வேறு வேறு இடங்களுக்குச் சென்று விட்டனர்.

மேலும், இந்த பகுதியில் காட்டு யானைகள் தொந்தரவும் அதிகரித்து வந்தது. இதனால், தொடக்கப்பள்ளியில் குழந்தைகளின் சேர்க்கை படிப்படியாக குறைந்து வந்தது. இறுதியாக கடந்த 2017-18 கல்வியாண்டில் ஒரே ஒரு மாணவி மட்டும் படித்து வந்தார். அதன்பிறகு, தொடக்கப்பள்ளி தற்காலிகமாக மூடப்பட்டது.

இந்த நிலையில், தேயிலை தோட்ட தொழிலாளர் ராஜேஸ்வரி என்பவர், தன்னுடைய 6 வயது மகன் சிவாவை அருகிலுள்ள பள்ளியில் சேர்க்க விரும்பினார். ஆனால், சுற்றுவட்டாரத்தில் ஒரு பள்ளி கூட இல்லை. 4 கிலோமீட்டர் தொலைவில் பெரியகல்லார் பகுதியில் ஆதி திராவிடர் பள்ளி மட்டுமே இருந்தது. இதையடுத்து தற்காலிகமாக மூடப்பட்ட சின்னகல்லார் தொடக்கப்பள்ளியை மீண்டும் திறக்குமாறு கல்வித்துறை அதிகாரிகளின் உதவியை ராஜேஸ்வரி நாடினார்.

ராஜேஸ்வரியின் ஆர்வத்தை புரிந்து கொண்ட ஆதி திராவிடர் நலத்துறை அதிகாரிகள், சிறப்பு நடவடிக்கைகள் எடுத்து, ஒரே ஒரு மாணவர் சிவாவுக்காக மூடப்பட்ட பள்ளியை மீண்டும் திறந்துள்ளனர். அந்த பள்ளியின் கவனித்துக் கொள்ளும் கூடுதல் பொறுப்பு பெரியகல்லார் பள்ளி தலைமைஆசிரியருக்கு வழங்கப்பட்டுள்ளது.

இது பற்றி பெரியகல்லார் பள்ளியின் தலைமை ஆசிரியர் சக்திவேல் கூறுகையில்: ’ தேயிலை தோட்ட தொழிலாளர்களின் குழந்தைகளுக்காக சின்னகல்லார் பள்ளி 1943ம் ஆண்டு தொடங்கப்பட்டது. சுமார் 70 வருடங்களுக்கும் மேலாக பள்ளி நன்றாக செயல்பட்டு வந்தது. ஒவ்வொரு வருடமும் குறைந்தது 50 மாணவர்கள் பள்ளி படிப்பு முடித்து வெற்றிகரமாக சென்று வந்தனர். ஆனால், நாளாக நாளாக தேயிலை ஊழியர்கள் வேறு இடங்களுக்குச் சென்றதால் அண்மைக்காலமாக பொலிவு இழந்து காணப்படுகிறது.

2017ம் ஆண்டுக்குப் பிறகு ஒரு மாணவர் கூட வராதாதல், சின்னகல்லார் பள்ளி தற்காலிகமாக மூடப்பட்டது. அதன்பிறகு அங்கிருந்த ஆசிரியர்கள் வேறு பள்ளிகளுக்கு இடமாற்றம் செய்யப்பட்டனர். தற்போது சிவா என்ற ஒரே ஒரு மாணவருக்காக சின்னகல்லார் பள்ளி திறக்கப்பட்டுள்ளது. நான் பெரியகல்லார் பள்ளியில் தலைமையாசிரியர். தற்போது எனக்கு சின்னகல்லார் பள்ளியையும், சிவாவையும் பார்த்துக்கொள்ளும் கூடுதல் பொறுப்புகள் வழங்கப்பட்டுள்ளது’
இவ்வாறு பெரியகல்லார் பள்ளி தலைமை ஆசிரியர் சக்திவேல் தெரிவித்தார்.

LEAVE A REPLY

Please enter your comment!
Please enter your name here